Kenscoff: PNH la chanje kòmandman an, Yon seremoni pou rann omaj bay viktim masak la, Plis pase 50 Ayisyen depòte soti Ozetazini

Nan dat 27 out 2026, Polis Nasyonal Dayiti (PNH) te anonse yon chanjman nan kòmandman li nan Kenscoff, akòz ensekirite k ap kontinye ogmante nan komin nan.

Nouvo responsab la gen misyon pou ranfòse operasyon polis yo, amelyore kowòdinasyon inite ki sou teren an epi ogmante prezans fòs lòd yo pou pi byen pwoteje popilasyon an.

PNH te fè konnen yon ekip operasyonèl deja mobilize pou kontinye entèvansyon kont gwoup kriminèl yo. Polis la vle kenbe presyon sou moun ki enplike nan zak vyolans yo, pandan l ap kontinye chèche arete moun li poko rive mete men sou yo.

Mezi sa yo te pran anba sipèvizyon Konsèy Siperyè Polis Nasyonal la (CSPN), ki prevwa lòt dispozisyon pou ranfòse sekirite, retabli lòd piblik epi pwoteje moun Kenscoff yo.

Chanjman kòmandman an montre volonte otorite yo pou bay operasyon sekirite yo yon nouvo direksyon epi anpeche gwoup kriminèl yo ranfòse kontwòl yo sou Kenscoff.

Apre masak ki te fèt nan Kenscoff nan lannuit 23 pou rive 24 out 2026 la, Premye Minis ayisyen an, Alix Didier Fils-Aimé, te bay lòd pou entansifye operasyon sekirite yo kont gwoup kriminèl yo.

Nan yon reyinyon ijans ak Konsèy Siperyè Polis Nasyonal la (CSPN), Premye Minis la te anonse gouvènman an pral pran mezi sevè pou idantifye epi pousuiv moun ki responsab vyolans yo, demantle rezo kriminèl yo epi reprann kontwòl zòn gang yo okipe.

Gouvènman an te di li pral mobilize tout mwayen leta genyen pou pwoteje popilasyon an epi retabli lòd nan peyi a. Li te renouvle tou sipò li bay Polis Nasyonal Dayiti (PNH) ak Fòs Ame Dayiti (FAd’H).

Premye Minis la te deklare masak Kenscoff la pap rete san pinisyon, pandan gouvènman an afime operasyon pou reprann kontwòl teritwa ki anba men gwoup ame yo deja kòmanse.

Jedi 27 out 2026, sitwayen yo te rasanble sou plas Boyer, nan Petyonvil, pou rann omaj bay moun ki te pèdi lavi yo nan atak sanglan ki te fèt nan Kenscoff nan lannuit 23 pou rive 24 out la.

Seremoni an, ki te inisye pa Sterline Civil, responsab mouvman Lajenès Ki Sa w Vle, te dewoule nan yon atmosfè chaje ak emosyon, tristès ak silans. Bouji, flè ak rad blan te sèvi kòm senbòl dèy, solidarite ak respè pou viktim yo.

Aktivite a te pèmèt patisipan yo sonje viktim yo, pandan yo t ap mete aksan sou doulè fanmi ki te pèdi pwòch yo ak twomatis kominote Kenscoff la ap viv. Mobilizasyon an te fini ak yon kesyon ki toujou rete nan lespri popilasyon an: Jiska kilè?

Gouvènman ameriken an te depòte plis pase 50 Ayisyen nan dat 27 out 2026, pami yo gen timoun ak moun ki te mande azil. Yo te rive nan Ayewopò Entènasyonal Kap Ayisyen nan mitan jounen an.

Se dezyèm vòl depòtasyon depi Etazini te mete fen nan pwogram TPS la. Premye vòl la te rive ann Ayiti 21 out ak 161 Ayisyen abò.

Dapre enfòmasyon yo, Etazini ta prevwa fè omwen de vòl depòtasyon pa semèn pou voye Ayisyen tounen. Sitiyasyon an ap soulve enkyetid sou fason y ap resevwa ak ede moun sa yo retounen nan lavi nòmal ann Ayiti, sitou timoun yo.

Anviwon 350,000 Ayisyen k ap viv Ozetazini ta riske depòtasyon apre desizyon gouvènman ameriken an te pran pou mete fen nan pwoteksyon TPS la.

Konsèy Elektoral Pwovizwa a (KEP) ap kontinye fè konsiltasyon ak divès gwoup politik nan kad preparasyon pwochen eleksyon yo ann Ayiti. Mèkredi 26 out 2026, prezidan KEP la, Jacques Desrosiers, ansanm ak lòt manm konsèy elektoral yo, te rankontre reprezantan plizyè gwoup politik nan Petyonvil.

Pami gwoup ki te patisipe yo, genyen nèf òganizasyon ki fòme « Fowòm nèf gwoup politik yo », ansanm ak Viktwa ak Soley. Diskisyon yo te konsantre sou dekrè elektoral la, kalandriye eleksyon an ak fason pwosesis elektoral la ap dewoule.

Reprezantan politik yo te prezante enkyetid yo, plent yo ak pwopozisyon yo bay KEP la. Gwoup ki gen rezèv sou kèk dispozisyon dekrè a oswa sou kalandriye elektoral la te envite pou soumèt yon dokiman ki rasanble tout demann ak pwopozisyon yo.

Rankont sa yo fè pati seri konsiltasyon KEP la ap fè ak sektè politik la. Objektif enstitisyon an se ranfòse dyalòg ak aktè politik yo epi amelyore pwosesis elektoral la, avèk espwa pou òganize eleksyon ki lib, transparan, kredib ak demokratik.

Ministè Edikasyon Nasyonal ak Fòmasyon Pwofesyonèl (MENFP) ap kontinye pibliye rezilta egzamen Leta 2026 yo.

Pou 9yèm Ane Fondamantal, rezilta yo disponib nan 9 depatman sou 10. Nan Latibonit, 18,801 kandida te reyisi sou 23,470 patisipan, sa ki bay yon to siksè 80.11%.

Pou NS4, rezilta yo disponib nan 8 depatman. Men to siksè yo:

• Sid: 71.71%
• Sant: 68.10%
• Sidès: 56.58%
• Nò: 48.97%
• Grandans: 42.84%
• Nòdès: 42.70%

Rezilta 9yèm Ane Fondamantal nan Nòdwès poko disponib. Menm jan an tou, rezilta NS4 nan Nòdwès ak Latibonit poko soti. MENFP di rezilta sa yo ap pibliye byento.

Ministè a mande responsab lekòl yo pou al pran palmarès lekòl yo nan biwo distri eskolè yo, pou yo ka jwenn rezilta ofisyèl yo.

Ronald André