Kat sòlda salvadoryen nan FRG disparèt nan zòn Santo, Fòs sekirite yo ap mennen kokenn chêne operasyon pou jwénn Solda sa yo, Nasyonzini kondane atak kont FRG a, Nouvo atak gang ame nan Ti rivyè Latibonit

Kat sòlda salvadoryen ki fè pati Fòs pou Represyon Gang yo (FRG) disparèt nan zòn Santo, nan Plèn Kwadèmisyon, nan nò Pòtoprens. Selon enfòmasyon jounal dominiken El Día rapòte, sòlda yo ta disparèt anvan ranfò yo te rive sou plas. Gen enfòmasyon ki fè konnen de ladan yo ta blese, epi yon sitwayen ayisyen ta disparèt tou. Sepandan, detay sou ensidan an poko konfime ofisyèlman.

Fòs lòd yo lanse gwo operasyon pou rive jwenn Solda sa yo. Pandan sitiyasyon an ap degrade, popilasyon an ap viv anba gwo laperèz. Dapre temwayaj yon moun, anpil fanmi rete fèmen lakay yo, pandan timoun yo oblije kache anba kabann pou pwoteje tèt yo kont bal.

Pandanstan, yon lòt reyinyon espesyal sou kriz ayisyen an te anonse pou lendi 19 oktòb la. Popilasyon an ap tann desizyon konkrè pou konbat ensekirite a epi mete fen nan vyolans gang yo.

—Konsèy Sekirite Nasyonzini an reyini lendi 19 oktòb pou diskite sou deteryorasyon sitiyasyon sekirite ann Ayiti. Manm yo kondane atak gang yo te fè sou yon machin blende Fòs Represyon Gang yo (FRG), nan zòn Santo, Kwadèboukè, kote kat sòlda salvadoryen disparèt.

Anbasadè Etazini nan ONU, Mike Waltz, deklare atak sa a pap fè kowalisyon entènasyonal la pè ni fòse li kite Ayiti. Li fè konnen Etazini kwè kat sòlda yo toujou vivan, epi y ap kontinye efò pou jwenn yo.

Bò kote pa li, reprezantan espesyal FRG a, Jack Christofides, fè konnen gang yo ap ogmante atak yo kont fòs sekirite yo, epi yo komèt zak reprezay apre operasyon lapolis ak fòs entènasyonal yo.

Pandan reyinyon an, plizyè peyi ensiste sou nesesite pou ranfòse prezans FRG a, enstitisyon leta yo, sistèm jidisyè a ak sèvis piblik yo, pou amelyore sekirite epi fasilite òganizasyon pwochen eleksyon yo.

—Lame peyi Salvador konfime kat militè yo ki deplwaye ann Ayiti nan kad Fòs pou Represyon Gang yo (FRG) disparèt apre yon anbiskad te fèt sou machin blende yo a pandan yo t ap retounen nan kan yo.

Dapre yon kominike Fòs Lame Salvador yo pibliye 18 oktòb 2026, eksplozif te frape machin nan, ki te pran dife. Kat militè yo, ki se teknisyen nan domèn aviyasyon, te rive soti nan machin nan.

Otorite salvadoryen yo voye elikoptè pou chèche militè yo, men aparèy sa yo te pran kout zam pandan operasyon an. Rechèch yo difisil akoz gwo ensekirite ak eklatman ki genyen nan zòn nan.

Fòs Lame Salvador yo ap kontinye kolabore ak FRG ansanm ak lòt fòs entènasyonal ki prezan ann Ayiti pou jwenn kat militè yo epi detèmine kote yo ye.

—Gwatemala òganize yon seremoni ofisyèl pou voye yon dezyèm kontenjan polis militè nan Fòs pou Represyon Gang yo (FRG) ann Ayiti. Desizyon sa a vini nan yon moman kote sitiyasyon sekirite a rete difisil nan peyi a.

Pandanstan, kat militè salvadoryen ki te nan misyon nan FRG disparèt apre yon atak sou machin blende yo a, nan dat 18 oktòb la, pandan yo t ap retounen nan kan yo. Machin nan te pran dife apre yo te fin soti ladan l. Rechèch yo t ap kontinye pou jwenn kat militè yo.

FRG a, ki te jwenn otorizasyon Konsèy Sekirite Nasyonzini an nan mwa septanm 2025, gen misyon pou ede fòs sekirite ayisyen yo konbat gang ame yo. Fòs la ka gen jiska 5 500 militè ak polisye, ansanm ak 50 anplwaye sivil.

—Gwoup gang ame lanse yon atak sou sant vil Ti rivyè Latibonit nan maten lendi 19 oktòb la, anviwon 3è. Selon temwayaj yon rezidan, atakan yo ta pran kontwòl kèk zòn nan vil la, tankou Mòn Fò ak Crête-à-Pierrot.

Sitiyasyon an rete enkyetan, pandan enfòmasyon sou evolisyon atak la ak entèvansyon fòs lòd yo toujou limite.

Atak sa a rive nan yon kontèks vyolans k ap ogmante nan depatman Latibonit la, kote gang ame yo deja komèt masak, detwi jaden epi mete dife nan kay pandan ane 2026 la. Malgre alèt lapolis, rapò Nasyonzini ak òganizasyon dwa moun yo, zak vyolans yo kontinye ap mete popilasyon an nan laperèz ak mizè.

Nouvo atak sa a soulve kesyon sou kapasite otorite yo pou pwoteje sitwayen yo epi reprann kontwòl zòn gang yo ap domine. Pou moun nan zòn nan, pi gwo priyorite a se kapab viv, travay tè yo epi deplase san yo pa pè pou yo viktim nouvo atak.

Ronald André