Twa sou senk manm CPT anba sanksyon ameriken, Fritz Jean te deja sanksyone

Pòtoprens, 25 janvye 2026 — Etazini anonse yo mete restriksyon viza sou de manm Konsèy Prezidansyèl Tranzisyon an (CPT), ansanm ak madanm/mari yo ak pitit yo, pou enplikasyon yo sipoze genyen nan aktivite ki gen rapò ak gang ann Ayiti.

Anons lan fèt pa Depatman Deta ameriken an atravè yon kominike ki siyen pa Thomas “Tommy” Pigott, pòt pawòl adjwen prensipal.

Dapre Washington, de responsab yo ta sipòte oswa fasilite aktivite gwoup kriminèl yo, sitou lè yo ta entèfere ak efò otorite ayisyèn yo pou konbat gang Etazini klase kòm Òganizasyon Teworis Etranje (FTO).

Sanksyon yo pran sou baz atik 212(a)(3)(C) nan lwa imigrasyon ameriken an, ki pèmèt Etazini refize antre sou teritwa li a nenpòt moun yo konsidere kòm yon menas pou enterè politik etranje peyi a.

Twa manm CPT kounye a konsène

Avèk nouvo desizyon sa a, twa sou senk manm CPT yo kounye a anba sanksyon Etazini.

Fritz Jean te deja sanksyone anvan.

Pami kat lòt konseye ki te siyen rezolisyon pou revoke Premye Minis Alix Didier Fils-Aimé, gen de ki konsène pa nouvo mezi sa yo.

Otorite ameriken yo pa pibliye non moun ki konsène yo, sa ki bay plas a anpil espekilasyon nan mitan klas politik la. Pou kounye a, pa gen okenn konfimasyon ofisyèl.

Depatman Deta a fè konnen Etazini kontinye sipòte estabilite Ayiti, soutni batay kont gang yo, epi yo pral ranfòse mezi responsabilite kont tout aktè k ap kontribye nan destabilizasyon peyi a.

Redaksyon an