Henry Wooster fè konnen se jistis ayisyen an ki dwe deside sou dosye Michel Martelly, De polisye mouri: SPNH-17 mande plis sipò sikolojik pou ajan yo, Repiblik Dominikèn: 67 Ayisyen arete nan operasyon kont imigrasyon ilegal

—Anvan Henry Wooster kite Ayiti, li fè konnen se jistis ayisyen an sèlman ki dwe deside sou dosye ansyen prezidan Michel Martelly, menm si Etazini deja pran sanksyon kont li. Li rekonèt tou majorite zam k ap sikile ann Ayiti soti Ozetazini, men li di li difisil pou elimine trafik sa a nèt.

Wooster fè konnen Etazini envesti anpil lajan pou sipòte misyon sekirite ak batay kont gang yo, men li admèt rezilta yo rete limite. Sou kestyon TPS la, li raple pwogram nan se yon mezi tanporè, pandan anpil moun kontinye soulve enkyetid sou sitiyasyon ensekirite ann Ayiti.

Li eksprime konfyans nan eleksyon k ap vini yo, men li rekonèt gen gwo defi tankou ensekirite ak feblès enstitisyon yo. An jeneral, mesaj li a mete aksan sou lefèt ke se enstitisyon ayisyen yo ki dwe pran responsablite pou rezoud kriz peyi a, menm si kominote entènasyonal la kontinye bay sipò.

—Sendika Polis Nasyonal Ayiti a (SPNH-17) mande otorite yo pran mezi rapid pou bay polisye yo plis sipò sikolojik. Demann sa a vini apre lanmò de ajan polis nan dat 20 jiyè, kote gen enfòmasyon ki fè konnen yo ta komèt swisid, men otorite yo poko konfime sa ofisyèlman.

Dapre SPNH-17, sitiyasyon sa a montre gen yon gwo pwoblèm sante mantal nan mitan ajan PNH yo. Sendika a estime estrès, vyolans ak twomatis polisye yo sibi nan travay yo pa jwenn ase sipò.

SPNH-17 mande pou mete sèvis sikoloji ak sikyatri disponib pou tout polisye, ansanm ak pwogram pou ede yo jere estrès ak difikilte ki lye ak fonksyon yo. Li mande tou yon swivi espesyal pou ajan ki pi ekspoze ak vyolans.

Sendika a ankouraje gouvènman an ak direksyon siperyè PNH la pran aksyon rapid pou pwoteje lavi polisye yo epi evite lòt trajedi.

—Premye Minis Alix Didier Fils-Aimé te patisipe nan lansman dezyèm edisyon Jounen Syantifik Fon BRH pou Rechèch ak Devlopman, ki te fèt 23 jiyè 2026 nan Otèl Karibe. Li te mete aksan sou enpòtans rechèch syantifik kòm yon zouti enpòtan pou devlopman dirab Ayiti.

Daprè li, envesti nan rechèch, inovasyon ak fòmasyon ap ede peyi a jwenn bon jan solisyon pou pwoblèm ekonomik, sosyal ak anviwonmantal li yo. Li salye efò BRH atravè Fon BRH la, ki ankouraje rechèch syantifik ak devlopman kapasite moun nan peyi a.

Premye Minis la te raple tou sekirite rete yon priyorite pou gouvènman an, paske estabilite nesesè pou atire envestisman, relanse ekonomi an epi òganize eleksyon ki lib, transparan ak demokratik. Li fini avèk yon apèl pou enstitisyon piblik yo, inivèsite yo, chèchè yo ak tout patnè yo travay ansanm pou fè rechèch syantifik tounen yon motè devlopman pou Ayiti.

—Òganizasyon Konbit San Pou San (KSPS) ranmase 350 pòch san pandan sèt kanpay don san ki te fèt ant oktòb 2025 ak jen 2026. Sou 491 volontè ki te prezante, 350 te kalifye pou bay san, tandiske 141 pa t kalifye.

Tout san ki te ranmase yo te remèt bay Sant Nasyonal Transfizyon San (CNTS) pou ede satisfè bezwen ijans medikal, operasyon, konplikasyon akouchman ak lòt pasyan ki bezwen transfizyon.

Malgre efò sa yo, peyi a toujou ap fè fas ak gwo bezwen an san, ansanm ak difikilte tankou mank pèsonèl, ekipman, sansibilizasyon, ak pwoblèm sekirite ak ekonomi. KSPS rekòmande pou ranfòse mwayen CNTS, amelyore ekipman yo, ankouraje plis moun bay san, epi kontinye devlope rezo ak patenarya pou ogmante kantite donatè regilye yo.

—Lame Repiblik Dominikèn anonse arestasyon 67 Ayisyen ki te nan sitiyasyon migratwa iregilye pandan plizyè operasyon nan pwovens Santiago Rodríguez, San Juan ak Elías Piña, toupre fwontyè Ayiti a.

Pandan youn nan operasyon yo nan Monción, militè yo te arete yon sitwayen dominiken yo akize dèske li t ap transpòte 19 Ayisyen san papye nan yon machin. Gwoup la te gen ladan l 9 gason, 8 fanm ak 2 timoun.

Otorite dominiken yo fè konnen y ap kontinye ranfòse kontwòl sou fwontyè a nan kad batay kont imigrasyon ilegal.

Ronald André