Gang Gran Grif rive Deschapelles, Bèlè : plizyè bandi mouri nan operasyon PNH ak dwon, FRG kontinye misyon li malgre disparisyon kat militè salvadoryen

—Polis Nasyonal Ayiti (PNH) lanse yon operasyon kont gang ame nan katye Bel-Air, dimanch 25 oktòb. Dapre yon sous nan lapolis, plizyè moun ame mouri, men pa gen okenn bilan ofisyèl ki pibliye.

Pandan operasyon an, lapolis ta itilize dròn kamikaz pou atake moun ame yo, yo sispèk ki enplike nan plizyè krim, tankou kidnaping pou ranson.

An menm tan, echanj kout zam ant lapolis ak moun ame rapòte nan Kwadèboukè. Gen enfòmasyon ki fè konnen yo te itilize dròn tou nan komin sa a.

Sepandan, jiska lendi midi, okenn bilan jeneral pa disponib sou operasyon sa yo. Otorite yo poko bay detay sou posib pèt nan mitan fòs lòd yo.

—Gang Gran Grif la, ki baze nan Savien, rive nan Deschapelles, yon semèn apre atak li te fè nan Ti Rivyè Latibonit, 18 oktòb la.

Sitiyasyon an bay anpil kè sote, sitou pou sekirite popilasyon an ak lopital Albert Schweitzer, ki se yon sant sante enpòtan pou plizyè milye moun nan zòn nan.

Avansman gang nan fè moun pè pou kriz imanitè a vin pi grav epi aktivite ekonomik yo bloke. Otorite yo mande pou yo aji rapid pou pwoteje popilasyon an, anpeche gang yo gaye epi asire lopital la kontinye fonksyone.

—Fòs Represyon Gang yo (FRG) deklare li pap sispann operasyon li yo akoz vyolans gwoup ame yo. Pozisyon sa a vini pandan Salvador voye fòs espesyal pou chèche kat militè li yo ki disparèt depi 18 oktòb.

Militè sa yo te nan yon machin blende gang yo te atake nan zòn Santo, Kwadèboukè. Apre atak la, machin nan te pran dife, men jiska prezan, pa gen enfòmasyon ofisyèl sou sò kat sòlda yo.

Anplis, otorite yo dekouvri kat kò boule, men idantite viktim yo poko konfime. Prezidan salvadoryen an, Nayib Bukele, fè konnen kadav sa yo pa ta fè pati militè yo ap chèche yo.

Pandan rechèch yo ap kontinye, FRG la reyafime angajman li pou ede retabli sekirite ak estabilite ann Ayiti.

—Konsèy Elektoral Pwovizwa a fè konnen li anrejistre 878 217 elektè nan dat 23 oktòb. Sepandan, dat eleksyon jeneral ki te prevwa pou 13 desanm nan pa fin klè, apre gouvènman an adopte yon twazyèm dekrè elektoral.

Dapre yon nòt pou laprès CEP la pibliye 25 oktòb, gen 1 306 sant enskripsyon ak vòt ki fonksyone. Anplis, 2 853 ajan rejis elektoral ak 4 643 ajan sekirite mobilize.

Pandanstan, CEP a ap tann rezilta konsiltasyon li te fè ak aktè politik yo ak sosyete sivil la, soti 19 pou rive 23 oktòb, pou li fikse yon nouvo kalandriye elektoral.

CEP a resevwa 4 577 dosye kandidati, dapre premye chif yo. Fanm yo reprezante 27,7 % nan kandida sa yo. Enskripsyon kandidati yo ap kontinye jiska 31 oktòb.

—Gouvènman ayisyen an felisite prezidan brezilyen Luiz Inácio Lula da Silva pou viktwa li nan eleksyon prezidansyèl Brezil la.

Nan yon kominike ki pibliye lendi 26 oktòb la, otorite ayisyen yo salye chwa pèp brezilyen an epi reyafime volonte yo pou ranfòse relasyon amitye ak koperasyon ant Ayiti ak Brezil.

Gouvènman an mete aksan sou enpòtans dyalòg, solidarite ak bonjan relasyon ant de peyi yo. Anplis, li swete kontinye travay pou konsolide relasyon bilateral yo epi ankouraje plis koperasyon ant pèp ayisyen ak pèp brezilyen an.

Ronald André