Fyèv elektoral la kòmanse cho pou prezidansyèl ki anonse yo, Asasina Jovenel Moïse : CSPJ denonse transfè 18 akize yo, Kenskoff : PNH anonse liberasyon 6 otaj

—Fyèv elektoral la kòmanse cho pou prezidansyèl ki anonse yo. Preske 10 kandida pou prezidan ki enskri an liy sou platfòm Konsèy Elektoral Pwovizwa deja ap twouse manch chemiz yo pou antre nan batay elektoral la.

Nou kapab site ansyen prezidan Michel Joseph Martelly ki enskri anba banyè gwoupman politik DEBLOKE, Ansyen sekretè deta popilasyon Wilner Joseph pou platfòm politik VIKTWA. Ansyen prezidan pwovizwa Jocelerme Privert prale sou lobedyans AYITI TRANSFÒME, ansyen Direktè Jeneral CNE a Jude Célestin ap retounen pou yon 3e fwa kandida pou prezidan anba banyè pati ENA. Ansyen depite Garry Bodeau bezwen prezidan anba banyè platfòm REKONSILYE epi ansyen premye minis Claude Joseph sou lobedyans pati EDE.

Anpil lòt nom ap site nan pèsonalite ki pral poze kandidati yo pou pwochen prezidansyèl yo. Men yo sanble ap tann a la dènyè minit pou enskri an liy.

—Pwosesis elektoral la ap avanse ann Ayiti, dapre Konsèy Elektoral Pwovizwa. Jiska 21 septanm 2026, gen anviwon 1 285 sant enskripsyon ak vòt k ap fonksyone nan peyi a, epi plis pase 628 755 elektè deja enskri.

Depatman Sidès, Grand’Anse ak Nippes se pami zòn ki gen pi gwo pousantaj enskripsyon yo, ak respektivman 16 %, 15 % ak 14,5 %.

KEP la fè konnen tou 30 estrikti politik deja soumèt lis 30 000 manm yo. Gen 7 kandida pou prezidans lan, 162 pou Sena a ak 419 pou Chanm Depite a ki deja anrejistre.

Pou prepare eleksyon yo, KEP la di li deja rekrite epi fòme 2 853 ajan rejis elektoral ansanm ak 4 643 ajan sekirite elektoral.

—Ayiti òganize, mèkredi 23 septanm 2026, nan New York, yon rankont ak plizyè peyi Karayib ak patnè entènasyonal sou finansman rezilyans, devlopman ekonomik ak chanjman klimatik, nan kad 81yèm Asanble Jeneral Nasyonzini an.

Premye minis Alix Didier Fils-Aimé mete aksan sou nesesite pou Ayiti konekte pwoteksyon anviwònman, rezilyans ak kwasans ekonomik. Li fè konnen mobilizasyon finansman dwe vin youn nan priyorite pou transfòmasyon peyi a.

Minis Raina Forbin mande peyi Karayib yo pale ak yon sèl vwa pou defann enterè ak priyorite rejyon an. Minis Valéry Fils-Aimé, bò kote pa l, ensiste sou enpòtans pou pase soti nan estrateji pou rive nan envestisman, epi soti nan envestisman pou rive nan rezilta konkrè.

Rankont lan te mete aksan tou sou finansman klimatik, pwojè rejyonal ak Agenda Antigua-et-Barbuda 2024-2034 pou ti eta zile yo. Plizyè responsab ak patnè entènasyonal te patisipe nan diskisyon yo.

—Konsèy Siperyè Pouvwa Jidisyè a (CSPJ) kritike desizyon gouvènman ayisyen an pou transfere 18 moun ki akize nan dosye asasina ansyen prezidan Jovenel Moïse pou mennen yo Ozetazini.

18 moun sa yo te transfere dimanch pou ale Miami, kote yo pral fè fas ak nouvo akizasyon devan lajistis federal ameriken. Yo fè pati yon gwoup 30 moun yon gran jiri federal nan Florid akize nan kad dosye a.

CSPJ estime transfè a soulve gwo kesyon sou endepandans lajistis ayisyen an. Dapre enstitisyon an, moun ki deja anba kontwòl yon jij enstriksyon dwe rete anba otorite jij sa a pandan pwosedi jidisyè a ap kontinye. Se poutèt sa, CSPJ konsidere egzekitif la pa t dwe pran desizyon sa a poukont li.

Dapre Depatman Jistis Etazini, akizasyon yo gen rapò ak plizyè wòl moun sa yo ta sipoze jwe nan konplo ki te mennen nan asasina Jovenel Moïse nan dat 7 jiyè 2021. Kat lòt moun deja kondane Ozetazini an me 2026 pou patisipasyon yo nan dosye a.

—Vennnde (22) moun yo akize nan dosye asasina ansyen prezidan ayisyen Jovenel Moïse parèt lendi devan yon tribinal federal nan Miami. Pami yo, gen 18 moun otorite ameriken yo te transfere soti Ayiti pou mennen Ozetazini.

Joseph Félix Badio, ansanm ak 17 ansyen militè kolonbyen, te prezan nan tribinal la. Christian Emmanuel Sanon, ki deja nan prizon Ozetazini depi plizyè ane, plede non koupab. Pwosè li dwe kòmanse 28 septanm.

Dapre akizasyon federal ameriken yo, 22 moun sa yo ta gen divès wòl nan yon konplo ki te vize touye oswa kidnape Jovenel Moïse epi ranplase l ak yon lòt lidè yo ta chwazi. Pwokirè ameriken yo di lajan ki soti nan kèk pwogram èd pou antrepriz pandan pandemi COVID-19 ta sèvi pou finanse yon pati nan operasyon an.

Jovenel Moïse te asasinen 7 jiyè 2021 lakay li nan Pèlerin 5, Pòtoprens. Madanm li, Martine Moïse, te blese nan atak la.

—Polis Nasyonal d Ayiti (PNH) anonse li te libere sis moun ki te pran an otaj pandan yon operasyon kont gang yo, ki te fèt dimanch 20 septanm nan Kenskoff, avèk sipò Fòs Represyon Gang yo (FRG).

Sis moun yo, pami yo de timoun ki gen 13 ak 16 an, te mete an sekirite nan komisarya Kenskoff apre operasyon an.

Ronald André