Biznisman Clifford Handal ak papa li chape anba yon tantativ kidnapin, 6 prezime bandi mouri, epi lapolis sezi yon fizi, KEP a pibliye ofisyèlman kalandriye elektoral la

—Konsèy Elektoral Pwovizwa (KEP) anonse ofisyèlman  premye tou eleksyon prezidansyèl, lejislatif ak konsiltasyon popilè sou chanjman Konstitisyon an ap fèt 13 desanm 2026. Dezyèm tou eleksyon yo ansanm ak eleksyon pou kolektivite teritoryal yo pwograme pou 21 fevriye 2027.

KEP fè konnen respè kalandriye sa a depann de amelyorasyon sitiyasyon sekirite a ak disponiblite resous finansye yo. Li mande otorite yo, gouvènman an, pati politik yo, òganizasyon sosyete sivil yo ak patnè yo pou kolabore pou asire eleksyon yo fèt nan bon kondisyon. KEP reafime angajman li pou òganize eleksyon ki enklizif, transparan, san patipri, epi ki respekte prensip demokrasi.

—Nan maten samdi 25 jiyè 2026, biznisman Clifford Handal ak papa li te chape anba yon tantativ kidnapin nan Delmas 33, toupre Lopital Inivèsitè La Paix. Daprè enfòmasyon yo, bandi ame te eseye bloke machin yo, men yo te rive sove paske yo t ap sikile nan yon machin blende.

Atak sa a vini nan yon moman kote kidnapin yo ap ogmante nan Delmas 33. Plizyè lòt ka ki enplike pèsonalite ayisyèn deja rapòte nan zòn nan. Sitiyasyon sa a kontinye soulve enkyetid sou degradasyon sekirite a, malgre otorite yo deklare gen pwogrè nan batay kont ensekirite.

—Lapolis Nasyonal Dayiti (PNH) anonse ke li mennen yon operasyon nan zòn Viard, komin Kenskòf, nan maten 26 jiyè 2026. Dapre PNH, operasyon an te fèt apre yo te resevwa enfòmasyon sou prezans moun ame nan zòn nan. Bilan an fè konnen sis (6) moun yo prezante kòm manm gang mouri, plizyè lòt blese, epi lapolis sezi yon fizi.

PNH pa bay okenn enfòmasyon sou arestasyon, idantite moun ki blese yo, ni sou si gen polisye ki viktim. Lapolis mande popilasyon an rete vijilan epi kontinye kolabore ak fòs lòd yo nan batay kont gwoup ame yo.

—Biwo Pwoteksyon Sitwayen (OPC) ap raple jèn yo ke yo rete sèlman kèk jou pou enskri nan Konkou Nasyonal Plede a, paske dat limit la se 31 jiyè 2026. Konkou a gen pou tèm « Dwa fanm ak eleksyon » epi li vize ankouraje jèn yo reflechi sou patisipasyon fanm nan lavi politik, pandan y ap devlope kapasite yo nan agimantasyon ak pale an piblik.

Konkou a ouvè pou elèv S1 rive S4, ansanm ak etidyan inivèsite ak lòt enstitisyon siperyè. Patisipan yo dwe chwazi youn nan de sou-tèm yo, voye yon tèks ki pa depase 1 000 mo, yon videyo 90 segonn, yon pyès idantite ak yon atestasyon lekòl oswa inivèsite.

Dosye yo ka voye pa imèl oswa depoze nan biwo OPC yo. Gayan yo ap resevwa plizyè rekonpans ak lòt opòtinite. OPC ankouraje tout jèn ki enterese yo pwofite chans sa a pou fè tande vwa yo an favè dwa fanm ak yon demokrasi ki pi enklizif.

—Dapre CBS News, otorite ameriken yo pral lanse yon gwo operasyon pou arete epi depòte migran ayisyen ki pa gen papye apre fen pwogram TPS la, ki te pwoteje anpil Ayisyen Ozetazini. Operasyon sa yo ta ka fèt nan plizyè eta, tankou Ohio, kote anpil Ayisyen ap viv.

Fen TPS la, ki rive 27 jiyè 2026, mete dè santèn milye Ayisyen nan gwo enkyetid paske yo ka pèdi dwa pou travay epi riske depòtasyon.

Pandanstan, Ayiti kontinye ap fè fas ak yon kriz grav kote vyolans gang yo, ensekirite, ak pwoblèm imanitè yo fòse plis pase 1.3 milyon moun kite kay yo. Plizyè òganizasyon dwa moun avèti ke voye Ayisyen tounen nan sitiyasyon sa a kapab mete lavi yo an gwo danje.

Jiska prezan, Depatman Sekirite Enteryè Etazini (DHS) poko konfime enfòmasyon sa yo, men kominote ayisyèn Ozetazini ap suiv dosye a ak anpil enkyetid.

Ronald André