Aprann jwe mwen doudou Teke kòd gita mwen : espesyal Senvalanten lequotidien509

Aprann jwe mwen doudou
Teke kòd gita mwen
Joukou ou jwenn nòt lanmou
Ki pou fè m chante pi wo

Lè nap fè lanmou
Ou se mizisyen
Mwen se enstriman
Aprann konpoze lanmou

Aprann jwe mwen cheri
Tout son ki sot nan bouch mwen
Se yon nòt ou rale
Na va jwenn melodi

Pou n fini mizik sa a
Fè andedan mwen rezonnen
Tankou vant tanbou yap bat
Ma gronde ma rale

Son rasin va monte
Fè nou danse mizik pa nou
Chatouyèt mwen tankou yon piyano
Yap akòde ak karès

Joukou nanm mwen sonnen
Si ou jwe yon fo nòt
Se pa grav revize
Repase sou touch la

Jouk ou jwenn bon akò a
Pa kanpe mizik la a pran nou
Voye nou monte ansanm
Aswè a wa jwe sou kò mwen

Demen na twoke plas…
Ma soufle w kon you twompèt
Fè ou jemi kou siflèt
Ma jwenn yon melodi

Ma jwe li sou tout kò w
Ma jwe li sou tout kè w
Chak kou nou fè lanmou
Se yon nouvo chante nou chante

An nou aprann fè lanmou
An nou aprann jwe mizik sa a

©️Muriel Vieux
31 Janvier 2018