Alèt jòn pou tanpèt Dolly, liberasyon otaj Kenscoff ak endiyasyon kont imaj depòtasyon Ayisyen anba chenn

Senk depatman ann Ayiti mete sou alèt jòn akoz move kondisyon metewolojik ki asosye ak rès tanpèt twopikal Dolly. Depatman yo se Lwès, Sant, Sid, Sidès ak Latibonit.

Dapre Direksyon Jeneral Pwoteksyon Sivil (DGPC) ak Inite Idrometeyowolojik Ayiti (UHM), move tan an kapab kòmanse vin pi grav depi lendi 31 out, epi li ka kontinye jiska madi 1ye septanm. Yo prevwa gwo lapli, loraj ak gwo rafal van.

Move tan sa yo ka lakòz inondasyon, debòdman rivyè ak ravin, glisman teren ak eboulman, sitou nan zòn ki pi vilnerab yo.

Pwoteksyon Sivil mande popilasyon an pou rete vijilan, swiv bilten metewolojik yo epi respekte konsèy otorite yo. Pandan loraj, moun dwe evite pyebwa ak poto elektrik, epi yo pa dwe travèse rivyè, ravin oswa zòn ki inonde, kit se a pye kit se nan machin. Yo konseye tou pou mete byen ak objè ki ka pran nan van an an sekirite.

Diznèf moun, pami yo timoun ak moun ki gen andikap, te jwenn liberasyon yo nan Kenscoff gras ak entèvansyon Frè Luckson, responsab òganizasyon “Zòn Pa Fè Moun”.

Frè Luckson te anonse liberasyon otaj yo sou paj Facebook li. Yo te kidnape yo pandan yon atak yon gwoup ame te fè nan Kenscoff nan nwit 23 pou rive 24 out 2026.

Malgre liberasyon 19 moun yo, sitiyasyon an rete makonnen. Dapre Frè Luckson, gen lòt moun ki toujou nan men gwoup ame yo, ki t ap mande pou li ale pèsonèlman sou plas pou ede jwenn yo.

Sitiyasyon sa a soulve anpil kesyon sou kapasite Leta ayisyen pou pwoteje sitwayen yo epi reponn efikasman devan kriz ensekirite ak zak kidnaping yo. Liberasyon otaj yo gras ak entèvansyon yon sitwayen montre feblès enstitisyon piblik yo nan jesyon kriz sekirite a.

Pandan tan sa a, fanmi viktim yo ak lidè kominotè yo di yo poko jwenn otorizasyon otorite yo pou òganize fineray yo.

Gwoupman politik VIKTWA te fè premye tès li sou teren an nan Kap Ayisyen pandan wikenn pase a. Plizyè milye moun te patisipe nan rasanbleman an, kote te gen plizyè pèsonalite, tankou ansyen premye minis Jean Henry Céant ak Mèt Camille Leblanc.

Pandan aktivite a, Pascal Adrien te prezante Wilner Joseph kòm youn nan pèsonalite yo ki kapab kandida pou pòs prezidan gwoupman an. Wilner Joseph ankouraje tout Ayisyen mete tèt ansanm pou jwenn solisyon pou pwoblèm peyi a, menm jan plis pase 50 pati politik te mete tèt yo ansanm pou fòme VIKTWA.

Nan okazyon an, Mèt Céant te eksprime volonte li pou kolabore ak Pascal Adrien ak Jorchemy Jean-Baptiste.

Ministè Edikasyon Nasyonal ak Fòmasyon Pwofesyonèl (MENFP) te pibliye rezilta egzamen leta pou ane akademik 2025-2026 la. Nan nivo nasyonal, 89,03 % elèv 9yèm ane fondamantal (9e AF) te reyisi, pandan 50,41 % kandida bakaloreya yo te pase.

Nòdwès se depatman ki pi byen pèfòme nan 9e AF, ak yon to reyisit 99,22 %. Nan bakaloreya (S4), depatman an te rive jwenn 78 % reyisit.

Pou Latibonit, to reyisit nan S4 la se 38,91 %.

MENFP te fè konnen rezilta detaye yo, selon lekòl, matyè ak sant egzamen, disponib sou sit ministè a.

Depatman Sekirite Enteryè Etazini (DHS) te pibliye yon videyo ki montre plizyè Ayisyen ak men ak pye yo mare pandan yo t ap monte nan yon avyon anba lapli pou retounen Ayiti.

Imaj sa yo te pwovoke anpil reyaksyon, sitou nan men plizyè eli demokrat ki kritike fason administrasyon Trump la ap fè depòtasyon yo. Yo estime mezi sa yo te kreye yon klima laperèz pou Ayisyen yo.

Etazini ap ogmante depòtasyon Ayisyen yo malgre kriz sekirite grav ki genyen ann Ayiti. Anplis, yo te mete fen nan estati pwoteksyon tanporè (TPS) pou Ayisyen yo apre yon desizyon Kou Siprèm Etazini, yon mezi ki te afekte plis pase 300,000 Ayisyen.

Administrasyon ameriken an, bò kote pa li, te defann politik la, li te fè konnen tribinal yo te mande moun ki pa gen estati legal pou yo kite peyi a.

Ronald André