NÒT PIBLIK SOU SITIYASYON PEYI A
Viv yon solisyon ayisyen! Viv yon Ayiti Granmoun Tèt li
Pòtoprens 9 fevriye 2024
Biwo Swivi Akò Montana (BSA) a kondane Doktè Ariel Henry ak akolit lokal kou entenasyonal li yo ki akselere dènye jou sa yo yon represyon sovaj nan tout peyi a pou yo ka kenbe pouvwa ilejitim ak ilegal yo a. BSA a solidè ak pèp ayisyen an k ap manifeste nan bon dwa l. L ap soufri a sila yo ki pèdi fanmi yo nan operasyon vèse san gouvenman sa pa sispann mennen depi 30 mwa nan itilize gang oswa aparèy represif Leta a. BSA ap pote dèy ak chak Ayisyen -fanm kou gason- paske se nou tout ki andèy nan moman grav sa a.
BSA a salye kapasite batay pasifik ak diyite pèp Ayisyen an nan goumen l ap mennen pou chanje rapò Leta a gen ak li, kont tout pouvwa kriminel, enkonpetan, ki kont nasyon an tankou pouvwa Dokte Ariel Henry a. Li felisite tou sektè ak tout akte ki pa janm rantre nan okenn konpwomisyon ak mòd pouvwa sa a ak alye li yo k ap kontinye sèvi ak gang ame pou anfonse peyi a pi plis nan kawo.
Majorite sekte nan peyi a : pati politik, òganizasyon vodou, legliz pwotestan, legliz katolik, mouvman peyizan, mouvman sendika, oganizasyon etidyan, oganizasyon atis a atizan, òganizasyon nan dyaspora a, òganizasyon k ap defann dwa moun ak dwa fanm yo, òganizasyon popile, ak plizyè lòt ankò, yo tout di pouvwa a ak kominote entènasyonal k ap sipòte l la SÈTASE, KANPE LA! Peyi a p ap antre nan lagè sivil pou ranfòse diktati. Nan dat 7 fevriye kite dwe selebre enstelasyon yon nouvo pouvwa ki ta sòti nan eleksyon, se pòt lagè sivil Ariel Henry, minis li yo, alye lokal ak entenasyonal li yo louvri sou peyi a.
Nou konstate aklè, nan moman sa a, lè pouvwa Ariel Henry ak alye li yo rive nan dènye jou yo te bay tèt yo pou kite pouvwa a, mwayen yo te di yo pa genyen pou konbat gang yo, bridsoukou vin disponib toupatou pou mennen operasyon masak ak represyon sou pèp revandikatif la.
Se pou peyi a pat rive nan katastwòf politik sa a a, menas lage sivil ki ka kondwi nan yon lòt fòm òkipasyon, ki fè Akò Montana te pran devan depi nan mwa dawout 2021, nan ranmase lide divès atè nan dives sektè, pou prezante yon solisyon ayisyen pou rezoud kriz la. Se te pou evite peyi a pat rive nan diktati pouvwa pèsonèl Ariel Henry ak alye lokal kou entènasyonal li yo ap chache tabli la a, Kifè Akò Montana, nan chimen konsansis a nan yon lespri patriyotik, te pibliye depi nan dat 10 oktòb 2023 yon “Demach pou tabli yon pouvwa tranzisyon tou nèf nan konsansis ak lapè: pou yon gouvenman sovtaj nasyonal”. Dokiman sa a se yon zouti pou konstwi yon lòt gouvènans konsansyèl nan peyi a pou pèmèt sekirite tabli nan peyi a, pou nou ka viv nan lapè, nan remanbre enstitisyon demokratik nou yo.
Jodi a li klè : majorite sektè nan peyi a konsidere Mesye Ariel Henry kòm yon ansyen Premye minis defakto alòske chèf li yo nan Entenasyonal la kite mete l’ sou pouvwa a, refize aksepte konsta echèk gouvènman yo a, menm jan tout pèp la fèl deja. Pa gen wout pa bwa: fòk Aryel Henry ak ekip li a libere espas pouvwa ekzekitif Leta.
BSA ap redi l ankò : Solisyon Kriz la se nan men pèp ayisyen an li ye. Li enpòtan pou tout fòs viv nasyon ki an rebelyon pasifik kont fòs lòd ak piyaje Leta yo, kontinye chèche nan lojik dyalòg nan mitan divès sektè nan peyi a pou jwenn yon konsansis ki ka mete kanpe yon pouvwa tranzisyon koupe fache ak yon Leta ayisyen granmoun tèt li, yon Leta ki ka bay nou tout ayisyen. – fanm kou gason- dwa pou viv tankou moun nan pwòp peyi pa n, peyi Dayiti.
Entèlijans politik, òganizasyon, rezistans, mobilizasyon sitwayèn se limy k ap klere chimen viktwa pèp la!
Pou Biwo Swivi Akò Montana/BSA a :
Magalie Comeau Denis
Jacques Ted Saint-Dic
Ernst Mathurin
Ginette Cherubin
Pierre Wilkens Cherisme
Marie-Christine Stephenson
