Nayib Bukele voye 100 sòlda espesyal pou chèche kat militè salvadoryen ki disparèt yo, Trafik zam pou Ayiti : Repiblik Dominikèn anvizaje jiska 30 an prizon, Meteyo: Senk depatman anba vijilans jòn akoz risk inondasyon

—Prezidan Salvadò a, Nayib Bukele, voye 100 sòlda nan fòs espesyal yo ann Ayiti jedi 22 oktòb 2026 la. Yo pral patisipe nan operasyon k ap chèche kat militè salvadoryen ki disparèt apre yon anbiskad gang « Chen Mechan » te fè sou yo nan zòn Santo, Kwadèboukè.

Dapre sous Miami Herald site, deplwaman sa a ta ka premye etap la. Gen posiblite pou 100 lòt sòlda vin ranfòse operasyon yo nan Pòtoprens.

Anvan sa, Bukele te menase gang yo, pandan li te mande pou yo remèt kat militè yo vivan e san blesi.

Sepandan, responsab mouvman Point final la mande pou prezidan salvadoryen an kowòdone nenpòt aksyon ak otorite ayisyen yo ansanm ak kòmandman Fòs Repwesyon Gang yo (FRG), ki anba direksyon Nasyonzini.

Li avèti ke Salvadò pa dwe voye sòlda ann Ayiti pou mennen operasyon poukont li. Dapre li, yon entèvansyon san kowòdinasyon ak otorite ayisyen yo ak fòs entènasyonal la ta ka sanble ak yon envazyon olye yon operasyon sekirite.

—Pati politik dominiken Fuerza del Pueblo pwopoze ranfòse sanksyon kont trafik zam ak minisyon ki ale ann Ayiti. Dapre yon atik N Digital pibliye mèkredi 21 oktòb la, pati a mande pou kèk enfraksyon kapab pini ak jiska 30 an prizon.

Orlando Espinosa, responsab Sekretarya Ladwàn ak Afè Pòtyè pati a, estime lwa dominiken yo dwe adapte ak metòd rezo kriminèl yo itilize pou fè zam ak minisyon pase ilegalman.

Pou soutni demann sa a, li site Lwa ladwàn 168-21, ki prevwa jiska 10 an prizon pou kèk ka kontrebann grav, ansanm ak Lwa 631-16 sou zam ak minisyon, ki prevwa jiska 30 an prizon pou kèk lòt enfraksyon. Se poutèt sa, li mande Kongrè dominiken an amonize de lwa sa yo.

Anplis, Espinosa raple plizyè ka sezi zam ak minisyon. Pami yo, gen yon kontenè nan pò Haina kote otorite yo ta dekouvri 36 000 katouch ak 23 zam, ansanm ak yon lòt ka kote yo ta arete yon militè dominiken ak yon sitwayen ayisyen ki t ap transpòte 1 516 katouch.

Fuerza del Pueblo pwopoze tou pi gwo pinisyon pou moun ki repete enfraksyon yo, konfiskasyon byen ki sèvi nan kontrebann ak ankèt sou moun ki òganize, finanse oswa benefisye trafik la.

Sepandan, pwopozisyon sa yo poko adopte. Yo dwe pase devan enstitisyon dominiken ki konsène yo anvan yo ka antre an aplikasyon.

—Inite Idwometeyowolojik Ayiti (UHM) mete senk depatman anba vijilans jòn akoz gwo lapli ak loraj. Depatman ki konsène yo se Grandans, Sid, Nip, Sidès ak Lwès.

Dapre previzyon yo, lapli yo ka vin pi fò vandredi 23 oktòb epi kontinye pandan wikenn nan. Kantite lapli a ka rive jiska 100 milimèt, ak rafal van nan kèk zòn.

Sitiyasyon sa a ogmante risk inondasyon, debòdman rivyè ak glisman teren, sitou nan zòn montay ak lòt zòn ki vilnerab.

Pou evite aksidan, UHM mande popilasyon an suiv bilten meteyowolojik ofisyèl yo, limite deplasman pandan gwo lapli epi evite travèse rivyè ki anraje. Li konseye tou moun ki nan zòn ki gen risk yo pran mezi pou pwoteje kay yo epi respekte konsiy otorite yo.

—Ayiti eli nan prezidans Komisyon administratif ak finansye Òganizasyon entènasyonal Lafrankofoni (OIF) pou yon manda yon ane. Anbasad Ayiti an Frans anonse nouvèl la nan yon nòt ki pibliye jedi 22 oktòb 2026 la.

Eleksyon sa a fèt nan kad 134yèm sesyon Konsèy pèmanan Lafrankofoni an. Komisyon an responsab egzamine bidjè OIF la, kontwole depans yo epi veye sou respè règleman finansye òganizasyon an.

Responsablite sa a pral pèmèt Ayiti patisipe pi plis nan desizyon administratif ak finansye OIF la. Sepandan, otorite ayisyen yo poko presize ki priyorite yo pral defann pandan manda sa a.

Ronald André