Prezidan Salvadò a menase fini ak gang yo ann Ayiti si yo pa libere 4 Solda yo, Kat manm FRG blese nan operasyon, Gang « Gran Grif » menase komisarya Ti Rivyè Latibonit la

—Prezidan Salvadò a mande pou yo libere san kondisyon kat teknisyen militè salvadoryen ki disparèt depi dimanch 18 oktòb 2026, nan zòn Santo, Kwadèboukè.

Dapre enfòmasyon ki disponib yo, kat teknisyen yo ta nan yon machin blende lè mesye ame atake yo, epi machin nan ta pran dife. Yo t ap patisipe nan misyon entènasyonal ann Ayiti, kote yo t ap bay sèvis nan evakyasyon medikal ak operasyon sekou.

Nan yon mesaj li pibliye sou rezo sosyal X, prezidan an fè konnen mesye yo pa konbatan, men teknisyen espesyalize nan aviyasyon. Li avèti gang yo si yo pa libere kat sitwayen sa yo, operasyon pou jwenn yo ak konbat gwoup ame yo kapab vin pi entans.

Twa jou apre disparisyon yo, otorite yo poko konfime kote kat teknisyen yo ye. Ka sa a rive nan yon moman kote vyolans gang yo kontinye ap boulvèse depatman Lwès la.

—Kat manm Fòs pou Represyon Gang yo (FRG) blese pandan operasyon kont gang ame yo nan Plèn di Kildesak, sitou nan zòn Santo, nan komin Kwadèboukè. Operasyon sa yo te kòmanse 18 oktòb 2026.

Dapre FRG, blese yo ap resevwa swen medikal. Premye rapò yo fè konnen plizyè manm gang mouri oswa blese nan echanj kout zam yo.

FRG fè konnen li ap kontinye rechèch pou jwenn sòlda salvadoryen ki disparèt depi 18 oktòb la.

Pandan batay yo ap kontinye, anpil abitan rete fèmen lakay yo. Gen kèk ki fè konnen yo prèske pa gen dlo ni manje ankò.

—Sitiyasyon sekirite a ap vin pi grav nan Ti Rivyè Latibonit, kote atak gang « Gran Grif » la, ki baze Savien, ta vin pi entans depi dimanch 18 oktòb la.

Dapre enfòmasyon lokal yo, mesye ame yo ap chèche elaji kontwòl yo nan zòn nan. Yo ta mete barikad nan plizyè sektè, sa ki rann sikilasyon ak entèvansyon fòs sekirite yo pi difisil.

Popilasyon an pè pou gang lan pa atake epi pran komisarya a. Yon sous nan lapolis fè konnen Lucson Elam, yo prezante kòm yon chèf gang, ta bay mesye li yo lòd pou kontinye atak yo jiskaske yo pran komisarya a. Sepandan, enfòmasyon sa a poko jwenn konfimasyon endepandan.

Devan menas sa yo, abitan yo mande otorite yo ranfòse prezans lapolis, bay ajan yo plis mwayen epi pran dispozisyon pou pwoteje fanmi yo, enfrastrikti piblik yo ak sikilasyon sou prensipal wout komin nan.

Jiskaprezan, pa gen okenn bilan konfime sou posib eklatman yo, ni detay presi sou mezi otorite yo pran. Popilasyon an rete nan enkyetid pandan l ap tann yon repons rapid pou anpeche vyolans lan gaye pi plis.

—Konsèy Elektoral Pwovizwa (KEP) la lanse, lendi 19 oktòb 2026, yon seri konsiltasyon ak pati politik yo, gwoupman politik yo ak sosyete sivil la pou mete kalandriye elektoral la ajou.

Dapre yon nòt pou laprès KEP la pibliye 20 oktòb, demach sa a vini apre chanjman ki fèt nan dekrè elektoral la, sitou tèks ki te adopte 6 oktòb 2026 la.

Objektif rankont sa yo se bay aktè politik yo ak sosyete sivil la opòtinite pou pataje opinyon yo epi pwopoze ajisteman ki nesesè pou òganizasyon eleksyon yo. KEP la fè konnen kontribisyon pati politik ki deja anrejistre manm yo epi soumèt kandidati yo ap ede l pran reyalite teren an an konsiderasyon.

Konsiltasyon yo ap kontinye pou pèmèt enstitisyon an egzamine diferan pwopozisyon epi rive sou yon kalandriye elektoral ki konsidere enkyetid aktè konsène yo.

Sepandan, KEP la poko anonse nouvo dat eleksyon yo ni dat definitif pou kalandriye elektoral la.

Ronald André