Gresye: Bandi touye epi dekapite Willard Vancol, direktè Radyo Ti Boukan FM. Lapolis jwenn rès kadav li nan yon raje

Lapolis anonse gwo avans nan operasyon kont gwoup ame yo nan zòn nan

KEP la louvri peryòd pou kandida yo depoze dosye yo

Apre twa semèn disparisyon, lapolis jwenn kò direktè Radyo Ti Boukan FM nan, rache, nan yon raje nan komin Gresye. Prèske tout Gresye boulvèse apre nouvèl sa a. Willard Vancol, kowòdonatè sant fòmasyon Institut de Technologie et d’Animation (ITECA) epi direktè radyo kominotè Ti Boukan FM, te disparèt depi 20 out 2026, jou gang yo te atake epi ravaje sant lan. Bandi yo te ale avè l menm jou a, e depi lè sa a, fanmi l ak moun ki pwòch li pa t gen nouvèl li. Pandan anpil moun te toujou gen espwa yo t ap wè l ankò, Polis Nasyonal la dekouvri kadav li 9 septanm pase a, nan yon rakbwa toupre sant ITECA a.

Dapre enfòmasyon PhilAyiti Media pataje, polisye yo jwenn kò Vancol rache. Asasinay responsab radyo kominotè sa a plonje tout kolaboratè l ak asosyasyon li te konn travay avè yo nan gwo tristès ak dezolasyon. ITECA ak lòt estrikti tankou Sosyete Animasyon ak Kominikasyon Sosyal (SAKS) di yo an kòlè epi yo endiye apre lanmò brital Willard Vancol nan Gresye. Responsab de òganizasyon sa yo dekri defen an kòm yon sitwayen remakab, yon figi enpòtan nan domèn radyo kominotè ann Ayiti.

Polis Nasyonal d Ayiti (PNH) anonse li ranfòse operasyon l yo nan komin Gresye, nan depatman Lwès, pou konbat gwoup ame yo epi retabli sekirite nan plizyè zòn.

Plizyè inite espesyalize PNH yo mobilize sou teren an pou reprann kontwòl zòn ki anba enfliyans gwoup ame yo, pouswiv moun ki ame yo epi pwoteje popilasyon an.

Operasyon sa yo vin pi fò nan yon moman kote ensekirite a kontinye afekte lavi moun nan Gresye, sitou deplasman yo ak aktivite chak jou yo.

PNH di li vle kontinye mete presyon sou gwoup kriminèl yo pou amelyore sitiyasyon sekirite a. Pou kounye a, otorite yo poko bay detay sou kantite arestasyon, zam yo sezi oswa viktim ki ta genyen nan operasyon yo.

Yon responsab legliz Lame Selès, Kerson Cazeau, yo te rele « Sonson », mouri nan legliz li nan Bwa Jira, Port-Salut. Dapre rapò yo, yo te dekapite l.

Pou kounye a, sikonstans lanmò a poko klè. Li te konnen kòm yon lidè relijye ki te konn òganize sèvis jèn nan lokalite a.

Konsèy Elektoral Pwovizwa (KEP) anonse ouvèti peryòd pou kandida yo depoze dosye yo epi fè deklarasyon kandidati yo pou pwochen eleksyon yo. Peryòd sa a kòmanse dimanch 13 septanm 2026 epi l ap fini 22 septanm 2026.

Kandida pou Sena ap depoze dosye yo nan Biwo Elektoral Depatmantal (BED) depatman yo, pandan kandida pou depite ak kolektivite teritoryal yo ap fè demach yo nan Biwo Elektoral Kominal (BEK) ki konsène yo.

Nan depatman Lwès, kandida pou prezidans ak Sena ap depoze dosye yo nan BED Lwès I, ki chita nan anèks KEP la, sou wout Frè. Gen dispozisyon espesyal pou kèk sikonskripsyon tankou Kafou, Gresye, Kenskòf, Kabarè, Kwadèboukè ak Pòtoprens III.

Sekretè jeneral Òganizasyon Eta Ameriken yo (OEA), Albert Ramdin, fè konnen gen yon sèten konplisite ant kèk aktè politik ak gang ann Ayiti. Li avèti lyen sa yo ka mete kredibilite pwochen eleksyon yo an danje.

Ramdin di li mande otorite ayisyen yo mete règ ki pou anpeche kandida ki gen lyen ak òganizasyon kriminèl patisipe nan eleksyon yo. Li fè konnen, jiskaprezan, li poko resevwa yon repons klè sou kesyon sa a.

Dapre li, ensekirite a rete pi gwo obstak pou òganize eleksyon nan peyi a. Li eksprime dout tou sou efikasite fòs entènasyonal k ap goumen kont gang yo, ak sou nivo sipò kèk peyi bay misyon an.

Sekretè jeneral OEA a souliye kriz Ayiti a se youn nan pi gwo priyorite òganizasyon an.