5 ane kriz sekirite: Leta toujou ap lite pou reprann kontwòl peyi a — Kenscoff: plis pase 2 600 moun oblije kite lakay yo apre vyolans yo — Morisseau Jean Pierre Ketler pran tèt komisarya Kenscoff

Depi batay Martissant yo an 2021, kriz sekirite Ayiti a pa sispann agrave. Malgre chanjman gouvènman, plizyè direktè PNH, sanksyon entènasyonal, misyon etranje, nouvo fòs tankou FRG ak menm sipò prive etranje, gwoup ame yo kontinye elaji enfliyans yo sou teritwa a.

Atak Kenscoff 23 ak 24 out 2026 la, kote omwen 47 moun mouri epi plis pase 50 moun kidnape, montre feblès sistèm sekirite a toujou la.

Pwoblèm nan pa sèlman kantite polisye oswa lajan yo depanse. Gwo kesyon an se: ki moun ki kontwole teritwa Ayiti a toutbon?

Senk ane apre Martissant, defi prensipal Leta a rete menm jan an: reprann teritwa a, pwoteje popilasyon an epi retabli otorite Leta nan tout peyi a.

Komisè prensipal Morisseau Jean Pierre Ketler te enstale kòm nouvo responsab komisarya Kenscoff, kote li ranplase enspektè Nikenson Cadet.

Chanjman sa a fèt nan yon moman kote kesyon sekirite a rete yon gwo sous enkyetid pou popilasyon Kenscoff, sitou akoz aktivite gwoup ame yo.

Popilasyon an espere wè rezilta konkrè ak nouvo responsab la, tankou plis prezans polisye, pi bon entèvansyon ak plis sekirite nan katye yo. Sepandan, pou l kapab reponn ak atant sa yo, li bezwen ase pèsonèl, ekipman ak mwayen lojistik.

Kounye a, tout je fikse sou nouvo responsab la pou wè ki chanjman li pral pote nan sekirite Kenscoff pandan semèn k ap vini yo.

Vyolans ame ki te fèt 23 ak 24 out 2026 nan Kenscoff fòse 2 647 moun, ki reprezante 702 fanmi, deplase, dapre done Òganizasyon Entènasyonal pou Migrasyon (OIM) ki te pibliye 26 out.

Pami moun ki deplase yo, 77 % ale rete lakay fanmi nan Pétion-Ville, pandan 23 % lòt yo al jwenn refij nan twa sit pou moun deplase. Zòn ki plis touche yo se Centre-Ville, Vilye, Tèt Dlo ak Mòn Jan Jak.

Vyolans yo lakòz tou lanmò, blese, kidnaping ak dife. Gen kèk fanmi ki te deja deplase nan lòt atak ki te oblije kouri ankò, sa ki vin agrave kriz imanitè a nan Kenscoff.

Dapre Nasyonzini, atak 23 ak 24 out yo te fè 47 moun mouri, 22 blese epi plis pase 50 moun kidnape. Yo atribye atak la a manm kowalisyon kriminèl Viv Ansanm.

Pandan sitiyasyon an ap kontinye degrade, Konsèy Sekirite Nasyonzini an dwe egzamine kriz sekirite ak imanitè ki genyen ann Ayiti nan yon reyinyon ki pwograme pou fèt 28 out 2026 nan New York.

Moun Kenscoff te òganize yon mach pasifik jedi 27 out 2026 pou denonse ensekirite ak vyolans k ap vale teren nan komin nan. Manifestasyon sa a te fèt twa jou apre yon atak san pitye kote, dapre enfòmasyon yo, plis pase 40 moun pèdi lavi yo anba bal mesye ame.

Manifestan yo te mache nan plizyè zòn ak pankat ak mikwofòn, pandan yo t ap mande lapè, jistis pou viktim yo ak plis sekirite. Yo te kritike otorite yo tou, ak mesaj tankou « Aba Leta gang », « Nou vle lapè retounen lakay nou » ak « Nou bouke konte kadav ».

Popilasyon an mande otorite yo pou yo pran mezi konkrè pou pwoteje moun, pouswiv moun ki responsab vyolans yo epi kreye bon kondisyon pou moun ki kite kay yo akoz atak yo ka retounen lakay yo.

Direksyon Depatmantal Nò Polis Nasyonal Ayiti (PNH), ansanm ak SDPJ, te fè konnen yo te mennen yon operasyon jedi 27 out nan lokalite Bò Lanmè, Limonad.

Operasyon an te pèmèt lapolis touye 3 manm gang pandan yon echanj kout bal ant fòs lòd yo ak manm gang yo. Pami bandi ki tonbe yo, gen Sonn Jabesi, yo prezante kòm youn nan chèf gang ki responsab plizyè zak kriminèl nan komin nan.

Gouvènman ameriken an te depòte plis pase 50 Ayisyen, pami yo timoun ak moun ki te mande azil. Yo te rive nan ayewopò entènasyonal Okap nan dat 27 out 2026.

Se dezyèm vòl depòtasyon depi fen pwogram TPS la. Premye vòl la te rive Ayiti 21 out ak 161 Ayisyen.

Dapre enfòmasyon yo, Etazini ta ka kontinye depòtasyon yo ak omwen de vòl pa semèn. Sitiyasyon sa a ap ogmante enkyetid sou fason Ayisyen yo, sitou timoun ak lòt moun ki vilnerab, pral jwenn akèy ak sipò pou yo reyentegre nan peyi a.

Yo estime anviwon 350 000 Ayisyen k ap viv Ozetazini kapab riske depòtasyon apre desizyon gouvènman ameriken an te pran pou mete fen nan TPS la.

Ronald André