Akò Montana pa patisipe nan gouvènman an : Lèt tou louvri pou Konsèy la

Lèt tou louvri pou Konsèy Prezidansyèl la

Manm Konsèy Prezidansyèl Transisyon,

Palè Nasyonal

Potoprens, 7 jen 2024

Depi 25 avril 2024, Konsèy Prezidansyèl Tranzisyon (KPT) an enstale ofisyèlman. Konsèy sa a se rezilta yon konsansis ant diferan sektè sosyal ak politik pou pèmèt peyi a gen yon nouvo gouvènans ki dwe gen kapasite pou fè fas kare rapidman ak soufrans popilasyon an ap sibi depi twò lontan, an patikilye pandan 3 dènye lane sa yo. Misyon nouvo ekzekitf Leta a – Prezidans ak Gouvènman an -, fonksyònman l, fèy de wout li, enstans ki pou kreye pandan peryòd sa byen defini nan Ako 3 avril la ak dokiman sou òganizasyon ak fonksyònman Konsèy la.

Sis (6) semèn apre enstelasyon an fèt, Konsèy la pa pran wout pou respekte angajman li te pran ansanm ak sektè yo devan sosyete a. Akò 3 avril ki ba l manda pa janm pibliye nan Le Moniteur la. Konsèy la, nan tèt kole ak Gouvènman demisyone a, pibliye yon dekrè kote li siprime tout referans ak konsansis ki mete l kote l ye a epi chwazi al mare kòd lonbrik li ak pouvwa 21 desanm nan. Pèsiste nan lojik pa pibliye Akò a se fè tranzisyon an tounen yon savann kote Konsèy la fè sa li vle jan li vle epi anpeche sosyete a gen yon lòn pou mezire zak li yo. Nan sans sa a, Akò a prevwa alapapòt pou manm Konsèy la mete tèt yo an règ avèk la lwa nan yon maksimòm 30 jou apre enstalasyon yo, jan sa ekri nan Akò a avèk nan Lwa sou Deklarasyon Patrimwànn.

Depi 25 me, Biwo Swivi Akò Montana a menm jan a tout popilasyon an ap tann anons ki fè konnen manm Konsèy la ranpli fomalite pou mete tèt yo an règ ak lalwa. Pandan gen anpil rimè koripsyon k ap kouri sou detounman lajan ransèyman Palè Nasyonal, sou kòb ki ta bay pou sèten kandida rive kòdonate Konsèy la oswa Premye minis, li enpotan pou obligasyon sa a respekte san delè pou sosyete a konnen sa k ap fè ak Konsèye ki pa an règ yo epi pèmèt evalyasyon patrimwànn yo klè lè Konsèye yo ap kite fonksyon an.

BSA a konstate Konsèy la mennen yon posesis ki pa koresponn a sa Akò a te prevwa pou chwazi yon Premye minis ak pou monte yon gouvenman sovtaj nasyonal ki pa dwe rezilta yon seri traktasyon pataje gato. Jan yo fè l la, se nan kontinyite metod tradisyonèl pou febli pèsonalite yo chwazi pou vin dirije gouvènman an epi mete tèt yo an pozisyon pou ekzije moso gato. BSA a pran not sou chwa ki fèt sou Dr Garry Conille pandan l ap swete Premye Minis lan rejwenn popilasyon an nan batay li pa sispann mennen kont abi, koripsyon ak enpinite pou rive viv nan respè diyite l. Se sèlman nan angajman l pou travay ak fòs sosyal ayisyen anndan kou deyò peyi a l ap rive reponn ak ekzijans gravite kriz global peyi a ap travese a.

BSA a ap kontinye defann entere popilason an, kòm reprezantan sekte Montana a nan asanble sektè Akò 3 avril la, lap enfòme popilasyon an li pa patisipe nan oken diskisyon ni manèv ak okenn manm Konsèy la pou plase moun andan gouvenman an. Se nan tranzisyon ki defini nan Akò 3 avril la, ki mete priyorite sou transparans, batay kont koripsyon ak enpinite pou tabli sekirite, soulajman soufrans popilasyon an, mete lòd nan administrasyon Leta a ak ogàn ki pou enstale yo, se nan Akò ki anonse Ogàn Kontwol Aksyon Gouvenman an, Konsèy Nasyonal Sekirite a, Konferans Nasyonal la, Komisyon Jistis Verite a, ki gen pou rekonèt dwa viktim yo, òganizasyon eleksyon san fòs kote se akò sa a, Akò 3 avril ki lye Montana ak tout sektè yo ak Konsèy la.

Yon lòt fwa ankò, BSA a redi Konsèy la fomèlman pou li reyini ak sektè yo pou n rive pibliye Akò 3 avril la ki se bousòl tranzisyon an pou pèmèt popilason an konnen kote l gad nan tranzisyon sa a, ki batay zouti sa a pèmèt li mennen pou fè respekte revandikasyon l. BSA a redi yon lòt fwa ankò pou manm Konsèy yo mete yo an règ avek Akò 3 avril la avèk Lwa peyi a ki prevwa sanksyon si yo pa prezante pyès yo kòm sa dwa.

Entelijans politik, òganizason, rezistans, mobilizasyon se limyè kap klere chimen viktwa pèp la!